شكون سؤال بالدارجة والجواب عندكم في سطات..

شكون شرب ماء البحيرة ديال البطوار حتى وكحات؟ شكون شرب ماء نافورة الخزانة البلدية حتى جفات؟ شكون لي كب على السطاتيين وقاليهم غاي نخدم 3000 منصب قار و4000 منصب غير من الشباب؟ شكون خلا البغال والحمير يتجول في الشوارع والازقة؟ شكون خلا صاروفات الكلاب تنبح وتبرزط المواطنين؟ شكون خلا الأحياء في الظلام بلا إنارة؟ شكون عطى التسليم لأرباب التجزئات وهم ممصيبين لا واد الحاء لا غنارة لا مدارس لا مساجد لا حدائق؟ شكون خلا السطات محفرة؟ شكون خلا الزبل منتاشر قدام بيبانكم؟ شكون بغا يبيع الخزانة البلدية اللي كيقراو فيها الفقراء للجامعة باش يوليو يدخلو ليها غير الاغنياء؟

شكون بغا يبيع ممتلكات الجماعة للمسستثمرين في صفقات مشبوهة؟ شكون خلا المدينة بلا حدائق شجرها كارم؟ شكون خلا ناس السطات ميصيبو فين يتنزهو ولا يخروجو؟ شكون خلا ضحايا الحادثة من السطاتيين في مستشفى مراكش؟ شكون اللي طفا عليكم التيليفون مباشرة فاش نجح؟ شكون ديما باب المكتب ديالو مسدود؟ شكون جرا على معامل المنطقة الصناعية بقوة الإبتزاز؟ شكون خلال الأحياء في الفقر والتهميش؟ شكون خدم ديولو وجرا على المعطلين من السطاتيين؟ شكون فرق البلايص في ماكرو على صحابو؟ شكون خلا الفار والطوبة تغزو شطيبة وأسواق سطات؟ شكون كرا الساحات العمومية ديال المدينة لصحابو من المنعشين العقاريين؟ شكون كيبزنز في مواقف السيارات بدون صفقة عمومية؟ شكون مسهرش على تطبيق استراتيجية التنمية الحضرية؟ شكون فصل وخيط  برنامج التأهيل الحضري كيف بغا؟ شكون حصلوه بطوموبيل الجماعة كيدوز رأس السنة في إفران؟ شكون لي بفلوسكم اليوم غالس كيشري بيها الأصوات؟ شكون وشكون والأسئلة مغاداش تسالي….

المهم الجواب عندكم يا السطاتيات والسطاتيين، وجا الوقت لي ياخد حسابو ويطلع برا، سطات كانت لبارح مدينة نقية ومدينة الشرفاء والأولياء الصالحين، واليوم فقدات لقبها كعروس الشاوية…وجا الوقت باش نردو ليها الاعتبار ديالها يوم 4 شتنبر، أنا ونتا ونتي وحنا كاملين، كلنا يد في يد لمحاربة الفساد والمفسدين لي خربو مدينتنا باش يفتاخرو بينا الأجيال القادمة ويرضاو علينا اجدادنا…

جميعا من اجل مستقبل واعد

{facebookpopup}